ترک قیلدی حیاتی زهتابی - حسین دوزگونون شعرلری
هر زامان جور ایله جفا گؤردو،
دار دونیانی بیوفا گؤردو.
سینادی دوستو دوشمنی یاری،
قارانی آغ، آغی قارا گؤردو.
جانی قوربانلیق ائتدیگی دوستو،
غئیر ایله یار و آشینا گؤردو.
هر کیمه یاخشیلیق روا بیلدی،
اؤزونه قارشی ناروا گؤردو.
یارینین خستهسی، غمه دوشگون،
یارا جان وئرمهده شفا گؤردو.
گؤزلری یاشلی قویدو اصحابی،
ترک قیلدی حیاتی زهتابی!
قلب، مظلوملوغون دویار آغلار،
خاطیرینه اونو سالار آغلار.
فرقتینده اونون دمادم، هی!
اورهگیم قاورولار، یانار، آغلار.
غمینی آشکارا چیخارمازسا،
کؤورهلیب قلب ایچینده زار آغلار.
قور سالار جانا آتش حسرت،
یاد گولر حالیمیزا، یار آغلار.
آتامیز دونیادان کؤچوب، دئیهرک،
دوزگون، ائلدار، سهند، یاشار آغلار.
گؤزلری یاشلی قویدو اصحابی،
ترک قیلدی حیاتی زهتابی!
یورد یواسینی بوش بوراخمایاجاق،
آیاق اوستونده ار- ارنلر اویاق.
یولونا دوستلاری دوام ائدهجک،
قوراجاقلار مزاری اوسته اوجاق.
دئدی اونلارا کیم کیتاب اوخویون،
علمدیر اسلحه، بیلیکدی یاراق.
قورخمایین بیرگه توپلانیب یورویون،
مدنی توپلو بیر نشیده قوراق.
نوحهچی بیر حزین سس ایله دئییر،
تؤکهرک گؤز یاشین آمان نه سایاق:
گؤزلری یاشلی قویدو اصحابی،
ترک قیلدی حیاتی زهتابی!
تبریز یوللاریندا - ص 70.
حسین محمدزاده صدیقین شعرلری (دوزگون) - ایکینجی وبلاگ
بيز احسان شكرخدا و ائلدار صديق ايكيميز بيرليكده «حسين دوزگون»ون شعرلري و ادبياتي يازيلاري و اونون باره سينده اولان شعرلري و ادبي يازيلاري بو وبلاقدا سيزه سوناجاغيق. اوميد ائديريك لذت آپاراسيز.