کیمسهنی هئچ زامان تعریف ائتمهدیم،
مدّاح شاعیرلرین یولون گئتمهدیم،
روحلاندیم من سنین صداقتیندن،
اؤزومه گووهندیم[1] پاک نیّتیندن.
اؤیگو [2] ایله دولو کئچمیشلرینی،
اؤیدوم عملینی، دوز ایشلرینی.
وورولدوم من سنین خوش حالتینه،
کیمدیر وورولماسین اصالتینه؟
حله سن اوتایا یاددا دئییرسن،
دانیشاندا دا اؤز دیلین اگیرسن.
هئچ یادیمدان چیخماز، اؤیگویله دئدین:
«بیزه دیل نه لازم؟ ایتلین! گئدین!
تورکونون کی هئچ بیر ضابطهسی یوخ،
فارسینین حؤرمتی اؤلکهمیزده چوخ!»
سئوگی سئچمکده من اینان چاشمارام،
کؤنلوم قاپیسین هر کیمه آچمارام.
سنی من سئویرم صحبتین اوچون،
دوزلوگه وئردیگین قیمتین اوچون.
سن منیم آنامی یاددان قورودون،
بو یولدا اوساندین جاندان چورودون.
خلقیمه بسلهدین درین بیر اینام،
محبت دفترین ائیلهدین تامام.
مقاما شهرته سن آلدانمادین،
یالتاقلار تکی اؤز ائلین دانمادین.
سارایا شاهلار قوشما یازمادین،
آغیر گونلرینده یولدان آزمادین.
مینم اسکی آشنام، دوغما قارداشیم،
منیم مرحمتلی عؤمور سیرداشیم.
کئچمیشم شیمشکدن فیرتینالاردان،
چوخ بلالار گؤروب بلالی باشیم.
اسکیدن منیمدیر بو یورد، بو چیمن،
جانیمدیر شانیمدیر بوشانلی وطن.
منی یاخشی دینله، کرکوک بولبولو!
سنی اوخشاییرام توفان ایچیندن.
سنین سؤزلرینی من ایزلهییردیم،
آذربایجانیمدا یول گؤزلهییردیم.
بؤیوک دایاق ایدی منه غرورون،
گؤرموردونمو یادی چوخ دیزلهییردیم!
شعریمدن قانلی بیر دفتر دیزمیشدیم،
گؤیده گؤیرچینین قانین سیزمیشدیم.
کرکوکلو محمد صادق آدینی،
آنا ورقینده اونون یازمیشدیم.
خیالیمین قوشو قاناد آچاراق،
یئنه اوچماق ایستیر سرحدن قیراق.
گئده دوغما قارداش کرکوک ائلینه،
خلق شاعیرلریندن آلا بیر سوراق.
دیلهییرم سرین بیر نسیم اسه،
سلامیمی سرپه «صلاح نورسه».
«محمد عزته»، «عثمان مظلوما»،
شانلی بایاتلاردا گؤرسه هرکسه.
الیمده قلمیم وار، اوراقیم وار،
کرکوکو گزمگه اشتیاقیم وار.
من کی قارداشیمی اونودمامیشام،
کؤنول تینجیقدیران بیر فراقیم وار.
وطنیمه منیم باغلیدیر کؤکوم،
بیلیرم یاماندیر، آغیردیر یوکوم.
کودتالار ایچره نئجه بوغولور،
آزادلیق حسرتلی منیم کرکوکوم.
وطندن وطنه گله بیلمیرم،
بیر لحظه اولسادا گوله بیلمیرم.
شاهنشاه خلقیمی زالوتک سورور،
آنالار گؤزونو سیله بیلمیرم.
قان آخیب بورادا داغدان درهدن،
شهیدلر مزاری آشیبدیر حددن.
بس منیم حالیما کیم یانسین قارداش،
وطنیمدهیم من وطنسیزم من.
- 1 -
تاریخین سونسوز رواقیندا منیم ده بیر رواقیم وار
بیر اولو «سلطانیه» [1] آدلی
بؤیوک قصریم،
بؤیوک طاقیم
اوتاقیم وار.
«تان یوقوق» [2] لاردان گلن، هئچ سؤنمیهن قیزمار اوجاغیم
هم سیغینماق چین بوجاغیم وار.
من، محمد (ص) نسلییم
انسان اوچون عزت وئرهن مسلک
عطْرلی قوینوم، قوجاغیم وار.
من ایشیق بخش ائتمیشم دونیالارا.
تاریخین هر بیر واراغیندا ایزیم قالمیش.
دوهام تاریخی جانلاتمیش،
نبوغوم دونیانی سارمیش.
من گونشدن دوغموشام
الده چیراغیم وار.
اوجا داغلار باشیندا سؤنمهین پارلاق مایاغیم وار.
بولود آغلار یاغیشلار،
یئره یاغیش باغیشلار.
یاغیش یئره دانالار،
یئر جانینا قان آلار.
قانین رنگی قیرمیزی،
من سئومیشهم بیر قیزی.
یاناقلاری آلما تک،
گؤزلری پیالا تک.
منله سئویب - سئویشدی،
کوسوب یئنه باریشدی،
گؤردوم اونو باخچادا،
گول ییغیردی بوخچادا،
سن گلدین، مست گلدین،
عشقه پابست گلدین.
مایل اولدون بیر گوله،
باغدا سالدین غولغوله.
غولغولهندن اویاندی،
بولبول غمه دایاندی.
او ناداندیر غم یئیه،
غصّه یئیه، غم یئیه.
«مأذون» گلمیش حیاتا،
همی چالا، هم دئیه.
هیکل تراش کیمی سنی یوندوم هامارلادیم،
هوپدوم وجودونا، گؤزونون ایچره پارلادیم.
شعریم اوچون دئدیم یارادیم بیر گؤزهل پری،
قلبیم درینلیگی اونون اولسون آخین یئری.
آیدان آری، سودان دورو بیر عیشوهلی گؤزهل،
اؤیله گؤزهل، یازیم وقارینا یئنی غزل.
سن اعتناسیز اول، منه هئچ باخما آی کیمین،
سایماز یانا یاناش، منه شأنین بودور سنین.
دکتر حسین محمدزاده صدیقین (دوزگون) - ایکینجی وبلاگی باخین
بویانا قاشدیم توتوندو،
اویانا قاشدیم توتوندو.
آغ آلمالار بوتوندو!
آغ آلمانین ساچاغی.
الیمی کسدی پیچاغی.
یاغ گتیرین یاغلییاق،
دستمال گتیر باغلییاق!
هر زامان جور ایله جفا گؤردو،
دار دونیانی بیوفا گؤردو.
سینادی دوستو دوشمنی یاری،
قارانی آغ، آغی قارا گؤردو.
جانی قوربانلیق ائتدیگی دوستو،
غئیر ایله یار و آشینا گؤردو.
هر کیمه یاخشیلیق روا بیلدی،
اؤزونه قارشی ناروا گؤردو.
یارینین خستهسی، غمه دوشگون،
یارا جان وئرمهده شفا گؤردو.
گؤزلری یاشلی قویدو اصحابی،
ترک قیلدی حیاتی زهتابی!
ایرانین من جانلی بئینی، بئینین ده جانییام،
آذرستان مولکونون بیر چاغلایان عمّانییام.
دینیم اسلامدیر منیم، قرآنی رهبر قیلمیشام،
ان گؤزهل یول سئچمیشم انسانلیغین وجدانییام.
قلبیم آولاندی ازل گوندن موغان قیشلاغینا،
بو ائلین، بو ملّتین بیر دوشگونو، حئیرانییام.
بیر شئیه هر کیم یالان یا دوغرو قوربان سؤیلهییر،
من معارف شهرینین، من اردبیل قوربانییام.
معنویت اولماسا، یوخدور حیاتین آنلامی،
ظاهیرین آلتیندا گیزلی باطنین انسانییام.
شئیخ صفینیندیر قارا مجموعهسی مشعل منه،
یوللاری آیدینلادان بیر شعلهی نورانییام.
مصحفیم بیر الده، شمشیریم بیر الده، آتلانان،
خلقی تقوا دعوتی ایله جوشان روحانییام.
هر یالان قورقو قوران اوباشا احسن سؤیلمهم،
شاعیرم، دوزگون تخلّصلو صداقت کانییام.
اردبیل لوحهلری - ص 5 – 1376.
نفَسیم، هوسیم، سسیم قاشقایی،
اوبام، ائلیم، کیمسهم، کسیم قاشقایی.
بایراغین چیگنیمدن قویمارام یئره،
قویما یاد اؤنونده اسیم قاشقایی.
دومانلی داغلارین آردیندا قالدیم،
دادیما یئت، فریاد رسیم، قاشقایی!
باشقالاریندان دای محبت اوممام،
سنین محبّتین بسیم، قاشقایی!
دوزگون دئییر: «منیم سسیمه سس وئر،
نفسیم، هوسیم، سسیم قاشقایی!»
قاشقایی لوحهلری - ص 9 – 1379.
اردبیل یوکسلیر آباد اولور،
تبریزین قلبی آچیر شاد اولور.
سئوگی بسلیر ائلینه نسلِ جدید،
گنجی یوز بیدادا بیر داد اولور.
تورکجهمیز فیرلاناراق دیللرده،
دؤنور عصیانلارا فریاد اولور.
اردبیل لوحهلری
درمانا چئوریلدی یار شعریم منیم،
وئردیگین درده دوا لازم دگیل.
شعریمی بوت تک سیتاییش ائیلیرم،
داها هئچ ربّ و خدا لازم دگیل.
کفر سؤیلرسم ایلاهی عفو قیل،
کافیره باشقا جزا لازم دگیل.
من سنین مجنونونام، عاغلیم اوچوب،
مجنون اوچون اعتنا لازم دگیل.
هر جفایا دوزگون عادت ائیلهمیش
بؤیله معتادا جفا لازم دگیل.
اورمو لوحهلری - ص 7.
یارب، فضولی تک منه ده اولگیل ابتدا،
گؤستر طریق جدّ پاکیمی، ای خالق سما!
اؤز اؤزلوگومدن آل منی، سنده فنا اولوم،
اؤیله ممات وئرکیم اولا مطلع بقا.
قلبیم اسیر دیرسنه، سندن مدد دیلر،
بودور صراط ده بیزه اول یار و رهنما.
کبر آشنالری بیزه اغیار اولدولار،
اؤز آشنالرینله بیزی ائیله آشنا.
لنگان انتهاسینا دوزگون یولون چاتیب،
گؤردوکی انتها دا دا هم سنسن ابتدا.
یورد غزللری - ص 1.
منله اکیلن آلچا آغاجی،
اگلهنیب باردان یئنه بوداغین.
ساللانیب یئنه تورش آلچالارین،
قاماشمیرمی بس سنین دوداغین؟
سنه وار منیم بیر خوش خبریم،
قولاق وئرگیلن دئییرهم دوزون.
آنام دئییرکی هر ایکیمیزده،
ایگیرمی یاشا دولموشوق بوگون.
آناما گؤره، من اولان گونده،
سن بوی آتیبان چیخیبسان دوزه.
منله یاشاییب منله قالیبسان،
منله دیل آچیب گلیبسن سؤزه.
بلکه من آناسیز قالایدیم
گؤزومدن یاشی کیم سیلردی؟
اؤیرهدهردی ساز - سؤز کیم منه
یوکسلمگیمی کیم دیلردی؟
کیم منه بس ناغیل دئیردی
هر سحر قوشمالار قوشاردی؟
آیدین بیر گلهجكدن اؤترو
اوخویوب، اوخویوب جوشاردی؟
قادا منه قارشی گلنده،
کیم «قادان دوشسون اؤز جانیما
آنان اؤلسون بالا» دئیهردی؟
اوندا کیم هرزمان یاناردی
منیم احوالیما دونیادا؟
منله کیم ایچردی غم اوغون؟
منله کیم دوشردی اودلارا؟
دکتر حسین محمدزاده صدیقین (دوزگون) - ایکینجی شعر وبلاگینه باخین
عاشورا گئجهلری تبریزده شمع پایلاما مراسیمی مناسیبتیله
«گولو - گولزار رسالت بو گئجه،
شیمردن ایستهدی مهلت بو گئجه!»
اذانین آخدی صداسی جانیما،
بو گئجه ایستهمه حاشا ائلیهم.
گئدیرم آی باجی قیرخ بیر مسجیده.
آنامین نذرینی برپا ائلیهم.
باش وئریبدیر نه قیامت بو گئجه!
قوی گئدیم بیرده قیزیللی مسجیده،
ساوموشام سورخابی، سئیتمزهنی من.
مقبره مسجیدینین آغزیندا،
آغلاماق باسدی باجی، لاپ بیردن!
گلدی اخلاص ایله حالت بو گئجه.
کربلانین کیتابین، قان ایچره،
آچدی نورانی بابام قارشیمدا،
قاینادی منده ده مظلوم داماریم،
نه هوالار وار ایمیش باشیمدا؟
بورودو جانیمی غئیرت بو گئجه!
داییمین زنجیرینین دویدو سسین،
قارا کؤینکلی گلیب قارشیلادی.
منی اؤز اصلیمه قایتار، باجی جان!
دئینه: «دوزگوندو بونون اصل آدی!»
قلبیمی ائیله ضمانت بو گئجه.
تبریز یوللاریندا - ص 12 - عاشورا گئجهسی 1368.
دکتر حسین محمدزاده صدیقین (دوزگون) - ایکینجی شعر وبلاگینه باخین
گل عاشق سؤزه،
گول چیخیب دوزه.
قاللام آخردا،
حسرت او گؤزه.
ساللانیب سالخیم،
بولانار آرخیم.
چئوریلهجکدیر،
آخردا چارخیم.
مندن یان اولار،
او سئودیگیم یار.
بیلیرهم آخر،
گونوم قارالار.
منده بو اورهک،
گئنیش گؤیلر تک
آچیقدیر، صافدیر.
بئله ده گرهك.
ائلیم اؤیونور،
زامانا دؤنور.
خلق اوچون منیم
قلبیم دؤیونور.
من آغلامازدیم،
درد چاغلامازدیم.
ائل قورتولسایدی،
جان داغلامازدیم.
میندی آتینا،
گئتدی ساتینا.
آلداندی یادین،
تبلیغاتینا.
کیچیک شعرلر - ص 54.
دکتر حسین محمدزاده صدیقین (دوزگون) - ایکینجی شعر وبلاگینه باخین
آرخ دیبینده یان - یان یاتان قیزیل داشلار.
ایتیرمیشهم دؤشو ساری بولبولومو
سیزه ساری اوچوب گلدی جهجه ایله
خبر وئرین تاپیم من اؤز سئوگیلیمی.
قاناد چالیب، هارا اوچوب هارا واردی؟
دیله گلیب دئیین منه نه اولارمی؟
خوشحال قیلین منی ایزین گؤسترمکله
اورهگیمدن قویون یویوم مینلر غمی.
یان – یؤرهزی اوزاقلاردان گؤزلهیهرهک.
گلیب چاتدیم سیزه آرتیق مین اومیدله.
گؤزلریمدن یاییناندا ساری قوشوم
گؤرموشایدیم اونو اوخور سیزین اوسته.
بیر دیللهنین قیزیل داشلار منیم اوچون
نئجه گلدی نئجه گئتدی ساری قوشوم؟
دئیین گؤروم نه اوخودو کی بیر بئله
رنگیز دؤنوب اؤزوز اولدوز اویوم – اویوم؟
آولادیمی سیزلریده بیر جهجه له؟
یانغین اورهک دونوق حالت ساری بولبول؟
ساچمادیسا عشقین یانار شعلهسینی.
نییه بیتیب بوردا آنجاق بس ساری گول؟
کیچیک شعرلر - ص 143 - 26 / 2 / 44 - آجی چای.
دکتر حسین محمدزاده صدیقین (دوزگون) - ایکینجی شعر وبلاگینه باخین
ماوی گؤیون، اعماقیندا، غروریله سوزوب
قاناد چالیب قالخ داهادا، اوجالارا قارتال.
بولوتلارین اوستوندنده، اؤتوب - گئچیب، قاوزان
قانادلان تا اورهگین کی سئویر هارا قارتال.
دایانماقدان اصلا چیخماز هئچ نه فایدا - بههر
طبیعتده وارسا عؤمرون، سوسما چالیش جانلا.
اورهگیوین یئلکنینی، آچیب اؤتور یئله،
ایستهدیکجه سئودیکجه ده، قانادلان ان اوجا
آزادلیغین عشقینه چال قانادلارین آرتیق،
طبیعته اورهگینده سئوگی بسله شیرین.
باجاردیقجا، تامام روحلا، جانلا چالیش، دورما
یئرده آچان چیچکلری قوی ایسلاتسین ترین.
اوجالارا یول آچدیقجا، گؤز سالدیقجا آلتا،
طبیعتین مینلر سیرری، سنه اولار عیان.
آزاد اوچوب اوجا قالخیب، گؤرهر گؤزله باخسان،
دورار گؤزون قاباغیندا، دانیشاجاق جاهان.
قارتال قاوزان بیزدن آیری دونیالاری سئیر ائت.
انسانلارا اوزاقلاردان گتیر خوش - خوش خبر.
دئینه گؤرهر گؤزله دوروب چالیشسینلار هامی.
دایانماقدان، خولیالاردان چیخماز بوردا ثمر.
کیچیک شعرلر - ص 105 - 13 / 2 / 44 آی قالاسی .
دکتر حسین محمدزاده صدیقین (دوزگون) - ایکینجی شعر وبلاگینه باخین
آردیندان بولوتلارین، غروبون آل قانلاری،
دامیر داملا - داملا ماوی گؤیون اوزونه.
گاهدا هیلالی، آیین اوزاقلاردان چاخیری،
گونشین سوسموش، ساری، ضعیف رنگلی گؤزونه.
بیر شاهین شفقلرین، ان درین اعماقینا،
یول آچیر، چیرپیناراق - آچاراق قانادلارین.
بوزالیر داها گونش، اوفوقلر ساری چالیر.
سانکی بیر قاوان دئییر: «شفقلر، سوسون، وارین!»
سؤنمه ای گونش! بیرآن، دایان قوی واله اولوم
ایچینده شفقلرین، شاهینین سوزمگینه.
سارالتما قانادلاری، چاتیشسین دایان سنه،
اورهگین یانمیرمی بس بوگؤزهل اوزمگینه؟
قوی حیران - حیران باخیم اونون محو اولماغینا،
قیزیل رنگه چالینان شفقلر دنیزینده.
باخسان بیر بو یارالی شاهینه، کیم سیزیری
آل قانلار نقطه - نقطه گئتدیکجه او ایزینده.
ای غروب! سؤنمه دایان یوردومو قارا ائتمه
یادا بیرجه آن گؤزله، یئتیریم قوجاغینا ...
قاچیرسان نییه مندن؟ چاتارام آخر سنه
پولهییب قالایارام کؤزلری اوجاغینا ...
کیچیک شعرلر - ص 107- 1345.
دکتر حسین محمدزاده صدیقین (دوزگون) - ایکینجی شعر وبلاگینه باخین
گل گیرهک آی گؤزهل، ناغیللار باغینا.
ترپهدک آتلاری، افسانه داغینا.
سئیر ائدهک خالقلارین، آرزوسون ایستهگین.
دویوبان سسلهدک، ائللرین دیلهگین.
گل تؤکک گؤز یاشی، آرزولار ایزینه.
دیزلیمچه باغلایاق، قهرمان دیزینه.
یاراقلی ائیلهیهک، قاباقجیل کیملری.
اوخویاق آغلایاق، تیترهدک سیملری.
هر زادی داغیلمیش - ساورولموش ائلیمین،
ولاکن غرورو، قاورولموش ائلیمین،
سولموش گول - چیچگین، قالدیراق یوخودان.
آلسینلار یکسره، انتقام دونیادان.
انتظار وورغونلار، چاتیشسین یارلارا،
بیز قوشاق نغمهلر، لذتلی باهارا ...
کیچیک شعرلر - ص 98 - 17 / 2 / 44 - هریس.
دکتر حسین محمدزاده صدیقین (دوزگون) - ایکینجی شعر وبلاگینه باخین
کؤنلوموزو نه اوچون یاندیریرسان یاخیرسان سن
چاخماق بئله پارلاییب، بیردن بیره سؤنمک نهدیر؟
حالتیوه تعجّبم، باش تاپمیرام ایشلریندن
ایزه دوشوب گئدیبن، غفلت حاللا دؤنمک نهدیر؟
یا بیر دفعه پارلاما، یا پارلادین داها سؤنمه،
قویما قالسین حسرتده بندلیلرین آخیل گؤزو.
ایزلهیهرهک چاخیشینی حالدان گئدیب اوزولوروک،
سندن اؤترو اؤلوروک، چاخماق بودور سؤزون دوزو.
مرحمت قیل، قان ائتمه، بیردن چاخیب بیردن یاخما،
کسگین حاللا یاندیرما ایتی تیغ تک جانیمیزی.
آخی سنه نه چیخار بیزی گؤیه ساوورمادان؟
آجیق وئرمه یازیغیق، گل قاراتما قانیمیزی.
چاخماق گل چاخ رؤشن قیل سؤنمهیهرهک دونیامیزی،
قارانلیغین ایچینده اوسانمیشیق جانیمیزدان،
باغرینی یار ظلمتین، گونه چیخارت بیزلری سن،
ظولمون - زورون الیندن جانا گلدیک آمان! آمان!
نهدن اؤترو یارانیب بیزده اولان ایکی گؤزلر
گؤرمهیهجک دونیانی، اولماغینین نه فایداسی؟
نهایت کی فناسی وارلیغی ایله فرقسیز گرهك،
بو حالتله قاراسا، یان - یؤرهسی هم دونیاسی.
چاخماق گل چاخ سؤنمهدهن، ایشه وارسین گؤزلریمیز.
طبیعتده هر بیرزاد یارانیبدیر بیر ایش اؤترو.
حسرت ایچره قالیبان ایزلهمکدن چاخیشیوی،
دای قالماییب قوّهلری آلماییبلار بسکی یوخو...
کیچیک شعرلر - ص 70 - 3 / 3 / 45 .
دکتر حسین محمدزاده صدیقین (دوزگون) - ایکینجی شعر وبلاگینه باخین
آنا!
گئیدین کفن اوغلونلا بیرلیکده،
گئدیب سنگرده یاتدین قیش گونونده شانلی تبریزده.
دئدین:
«- گئتسین بوتون شاهلار،
عدالت بایراغی گؤیلرده یوکسلسین.
امام گلسین!
امام گلسین!»
دوشنده یئرلره شمشاد قدّدی اوغلوون، بیردن
دئدین:
«- جلاّد وور منده اؤلوم گؤرسون وطن!»
سن آذربایجانسان دوشمنه بیر پارچا اودسان
منیم قلبیمده وولکان سان
الیمده مشعلیم، نوروم،
آدین معنا وئریر میلیونلار انسانا.
شفقلر، کسرویلر، رعدیلر، یحیی ذوکالار
سومسونن کارنگلر وارسا،
سنین میلیونلار اوغروندا عزیز جانین قویان واردیر،
اوجا داغلاردا آصلان تک
خبیث گؤزلر اویان واردیر.
ساییندا آددیم - آددیم عزّی فرّین ساخلایان واردیر،
سایان واردیر.
تبریزین ارکینین آیاغی آلتیندا،
اردبیلدن گلن گؤزهل بیر جوان،
سریلدی یئره.
ایکی آغ گؤیرچین،
باشی اوستونده،
قوپدو ارکین سؤکوک - تؤکوک بؤیرونه.
بیری دئدی:
- باجی!
باشقاسی سؤیلهدی:
- باجی! جان باجی!
سؤیله سؤزون باجی، باشیمین تاجی!
- بیلیرسن ارکیمین، قوجا ارکیمین،
آیاغی آلتیندا ییخیلان کیمدیر؟
تورپاقلار اوزهره سریلن جوان،
بو ایگید اوغلان؟
- یوخ، بونو بیلمیرم!
کیمدیر، سن سؤیله!
- اردبیلدن گلمیش عاشیق ایگیددیر.
یارالانمیش قلبی، مجروح سینهسی،
کسیلمیش نفسی، باتمیشدیر سسی!
درمانی تاپیلمیر، درمانسیز قالمیش!
- قانادیمدان ایندی بیر پر سالارام،
کاشکی اوغلان اونو گؤتوره بیلسین،
ایشیقلی دونیایا اوزونو توتسون،
نفسین گونشه یئتیره بیلسین،
سینهسینین قانین پریمله سیلسین ...
اردبیل لوحهلری - ص 17- 1379.
دکتر حسین محمدزاده صدیقین (دوزگون) - ایکینجی شعر وبلاگینه باخین
تبریز سؤزو قولاغیما دهگنده،
جانلانیر گؤزومده معلملریم.
«حکمت مدرسهسی»، «لقمان»، «فیوضات»،
«دانشسرا» گلیر خیال ائوینه.
منه غرور وئریر بو آد، بو حیات،
اؤزومو تبریزلی کیمی گؤرهنده.
کیتابخاناسیندا «تربیت»ین من،
گؤرورهم اوتوروب «امیر شقاقی».
اونلا اوخویارکن «گلشن راز»ی،
اؤتورم کئچیرم بوتون آفاقی.
منه اوخوتدوران «عقد الفرید»ی،
بورادا اؤیرهدن «برهانی» هانی؟
معناسی تبریزین «مشکوة» دیرمنه،
اوخویوب سئودیگیم «معراجنامه» دیر.
گؤزلریم اؤنونده او مرد کامل،
«آقا میرزا عمران»، «شرح لمعه»سی،
«منطق کبری»سی، بیرده «عوامل».
بيز احسان شكرخدا و ائلدار صديق ايكيميز بيرليكده «حسين دوزگون»ون شعرلري و ادبياتي يازيلاري و اونون باره سينده اولان شعرلري و ادبي يازيلاري بو وبلاقدا سيزه سوناجاغيق. اوميد ائديريك لذت آپاراسيز.