منله اكيلن آلچا آغاجي،
اگلهنيب باردان يئنه بوداغين.
ساللانيب يئنه تورش آلچالارين،
قاماشميرمي بس سنين دوداغين؟
سنه وار منيم بير خوش خبريم،
قولاق وئرگيلن دئييرهم دۆزۆن.
آنام دئييركي هر ايكيميزده،
ايگيرمي ياشا دولموشوق بوگۆن.
سؤزلري خرمدرهلي، لهجهسي دادلي دلبريم،
عاشيقينين آجي قيشا دؤزمگي سندن ساريدير.
قاچغين اولوب دال چئويريب يوردا، ائله، يوواسينا،
شيرين جانيندان اللرين اۆزمگي سندن ساريدير.
خويونون خولقونون سنين يوخ قوخوسو بوردا گؤزهل،
بيقماغي، بو حياتدان بئزمگي سندن ساريدير.
ائودن الين اۆزۆب چؤلۆن در به درينه چئوريليب،
يايي، قيشي، داغ درهني گزمگي سندن ساريدير.
من بيليرم دؤزمز ايميش ذرهجه دۆزگۆن يالانا،
بونجا يالانلارا گؤزهل دؤزمگي سندن ساريدير.
زنگان لوحهلري - ص 45.
هر مسلكه، هر فيرقهيه اؤز باشيم اوزالتديم،
يالنيز سنين عشقين سبب اولدو، بونو بيلسن!
جايديمسادا، انسانا سعادت ديلهديم من،
آرزوم بو ايدي يۆكسلهسن سن گۆنۆ - گۆندن.
ياد گۆلـلهلهدي دوستلاريمي اللريم اۆسته،
قلبيم ائلهديم اوف دئمهدن، اونلارا مدفن.
من يانديم اؤزۆم، هر نهييمي بادا ساووردوم،
تك عشقي بؤيۆك اردبيله سؤيلهديم احسن!
اردبيل لوحهلري/ ص 13 .
آرزوم بو ايدي جنت ائديم باشدان آياغا،
هر بير كۆچهوي، هر برهوي، دؤنگهوي تبريز.
سن آرزو ائديردين بشريت ياشاسين شن،
منده ديلهييرديم سنه شن گۆنلري تبريز.
آلدي غرور حسي مني تبريزلي سؤزۆندن،
گزديكجه بۆتۆن دۆنيالاري، هر يئري تبريز.
هئچ كيمسهده يوخ سنده اولان صير - صيفت اصلا،
انسانليغا آچديم بۆتۆن اسطورهوي تبريز.
تا دۆنيادا قانون يارادان هر كس اوتانسين،
آلسين اؤزۆنۆن بئينينه مفكورهوي تبريز.
سندن هامي هر اؤلكهده تقليد ائلهسينلر،
گلديم قرارا، شاهه چكم نغمهوي تبريز.
اۆلگۆ يارادام هر يئني نسله آنا، سندن،
دۆنيايا يايام پاكليغيوي سلقهوي تبريز.
قوي قافيهلر هپ غلط اولسون، نه ايشين وار،
دۆز سؤز، دۆز اينام قوي بۆرۆسۆن دؤورهوي تبريز.
تبريز يوللاريندا / ص 29.
بهار دير، سئيره چيخ، گۆلزاره گل، ياتما قارا يئرده،
بو داغلاردا ساليبلار شاققاشاق سئللر، حبيب ساهير،
عاشيق باغرينا باسميش سازيني سندن اوخور بير شعر،
يانيقلي قلبي اۆزره سيزلايير تئللر، حبيب ساهير.
نه قدري ظاليمين تانكي تۆفنگي برقرار اولسا،
سن اؤيرهتدين بيزه كيم سوسماسين ديللر، حبيب ساهير.
زمانين چرخي دؤنسۆن، روزگارين دؤري چئوريلسين،
سني يالقوز و تنها قويدو بو ايللر، حبيب ساهير.
اؤپۆر دۆزگۆناليندن، يوخدو كفران نعمته بيزده،
سني ياد ائيلهيير هر دم بيزيم ائللر، حبيب ساهير.
يورد غزللري/ ص 15.
اوستاد اولماق ايستر ايسن حؤرمت ائت اوستادينا،
كيشمشه دؤنمز عزيزيم، غوره، انگور اولمادان.
پايدار اولسون نواميس الوهيت، دئيه،
ايچدي جام شوكراني، تۆرك مجبور اولمادان.
دردينين ذكرين ائدهنده، صوت احسنله دانيش،
يوخدور تأثيري سؤزۆن حال اولمادان شور اولمادان.
ائل قبول ائتمز، اينانماز صيدقينه دۆزگۆن سنين،
تا فضولي قيسي مثلي عاردن عور اولمادان!
يورد غزللري/ ص 45.
گل چيخارت دفتريني، شعرين اوخو،
خط به خط قوربان اولوم سؤزلرينه.
نئجه من سؤيلمهييم حيرانام،
او صداقتله دولو گؤزلرينه؟
آييق اول دۆشمنيوين حيلهسي وار،
كۆل قالار ديوانيوين كؤزلرينه.
دينلهييرلر سني حؤرمتله اوخو،
اوخو گليسنلر قوي اؤزلرينه.
ساهير اوغلو ساييليرسان، دۆزگۆن!
قورخما سؤيله سؤزۆنۆ اۆزلرينه.
يورد غزللري/ ص 55.
بيز احسان شكرخدا و ائلدار صديق ايكيميز بيرليكده «حسين دوزگون»ون شعرلري و ادبياتي يازيلاري و اونون باره سينده اولان شعرلري و ادبي يازيلاري بو وبلاقدا سيزه سوناجاغيق. اوميد ائديريك لذت آپاراسيز.