یان دوشموشدو، آناسیندان،
بیر بالاجا ساری کؤینک.
جهجهیندن دویولوردو.
باشینا بلا گلهجک.
بیر شرارت کند اوشاغی،
اوتلادیردی قوزو – قویون.
شاپاند - قایا تاولایاراق.
چیخاردیردی مینلر اویون.
داغ دؤشوندن آچیلان آرخ،
تا هاراجاق گئدهجکسن؟
بیلیر سنمی نه واخت، نئجه،
هارادا سن ایتهجکسن؟
هئچ خبرین وارمی سوندان؟
آشناسانمی گلهجكله؟
یارا - یارا یوسما یئری،
اوغرانیرسان هارا بئله؟
گؤزو آلا شاملو قیزی،
سینهنده ناری ایستهرم.
گلهجگی یئتیرمگه،
سنین تک یاری ایستهرم.
اؤز ائلیمه جان دئمیشم،
دوشمنه قان-قان دئمیشم.
سئوگیلیمه یان دئمیشم،
یارِ بیداری ایستهرم.
شاعیر دوستوم، دایان حله،
الیم بیلمیر یورولماغی.
منی دینله، منی دینله،
بیلیرسن کی اؤزون بئله.
چوخ آجیدیر بیر شاعیرین،
تک اولماغی، تک اولماغی...
غملر سنی جانا گتدی،
رنگین اولدو ساری بولبول.
قلبین ظالیم قیش آولادی،
گل آغلاما باری بولبول.
کؤکسونده اودلاندی اورهک،
گولونج اولور بوردا ایستهک.
هانی کئچمیش زامانلار تک -
باخچالارین باری بولبول.
قهرمانلار دیریلهجک،
اؤنونده یاد اگیلهجک،
اوغوللارین سئویلهجک،
شن گلهجك، تئز گلهجك،
آنا وطن، آنا وطن!
عطیرلیدیر قوینون سنین،
گولـلهنجک درهلرین!
گئدهجکدیر دردین - غمین،
دیلکلریم آچار چیچک،
آنا وطن، آنا وطن!
یاد باغیریر یالان - یالان،
منه دئییر: بیزه اینان!
ائتمیر بونو اصلا گومان،
سندن اولماز هئچ ال چکمک،
آنا وطن، آنا وطن!
بولاقلارین سرین سنین،
چشمهلرین درین سنین،
اوجا ذیروه یئرین سنین،
ان گؤزهلسن، بونو بیلک،
آنا وطن، آنا وطن!
سن منیمسن، منیمکیسن،
سن بیر ایدین، بس ایکیسن؟
اورهگیمده سن، تکی سن،
یئر دوتوبسان، بئله گرهك!
آنا وطن، آنا وطن!
گؤزهللیکده بیر دنهسن،
منجه، دونیا تکی سنسن.
آنجاق سنه باغلییام من،
صرف ائتمیشم بوردا أمک،
آنا وطن، آنا وطن!
داغلاریندا گول آچاجاق،
قیزیل گونش نور ساچاجاق.
ایشیغیندان قورد قاچاجاق،
او گونه گل کؤنول وئرهک،
آنا وطن، آنا وطن!
قان رنگینده بایراغین وار،
دونیالارجا نؤوراغین وار،
یاز نفسلی مین داغین وار،
من قویموشام بوردا اورهک،
آنا وطن، آنا وطن!
کیچیک شعرلر - ص 6 .
اسکی بیللور لالهسینی،
هر گون سحر - سحر سیلر.
توزون آلار، پاریلدادار،
دوروب بیر آنلیق سئیر ائدهر.
تیکر یورغون گؤزلرینی،
سانکی دالار کئچمیشلره.
آغ بیرچکلی قادین آنام،
هئچ باخیشین سرمز یئره.
باشی اوجا، گؤزو دیری،
لالهسینه باخار، باخار.
باخیشینین وسعتینه،
یولدان گلر گوللو باهار.
گؤزلرینین شعاعسیندا،
دؤزوملردن نشانه وار.
دوغرولوقدان، دوزگونلوکدن،
صداقتدن ترانه وار.
آذربایجان ائللرینین،
آناسیدیر منیم آنام.
قلبدن قوپان شعرلریمین،
آیناسیدیر منیم آنام.
قلبینده ذرهجه توز یوخ،
تمیز بیللور لالهسی تک.
صافدیر، تمیزدیر، آری دیر،
کؤکسونده آلیشان اورهک.
زنگان لوحهلری - ص 71 - 11 / 3 / 77 .
کؤهوللر[1] ایشدن دوشوبدور،
شاه بولاغی سویون لیلدی.
بیر ایچیم سو ایچنمهدیم،
حسرتینم نئچه ایلدی.
اولارام من سنه برده،
سن نردهسن، اوغلون نرده.
درمانسان هر غمه، درده،
سندن آخان قیزیل گولدو.
سؤز قوشدوم اورهك داغلادیم،
غصه دن چلنگ باغلادیم.
چوخلارینا من آغلادیم،
دردیمی تک دوزگون بیلدی.
زنگان لوحهلری - ص 13 .
[1] کؤهوللر: شاه بولاغی سویو ایله ایشلین، سلطانیه کناریندا دگیرمانلار توپلولوغو.
سلطانیه! ابهر داغین،
کؤکسونه گول تاخار اولسون.
یئنه آلاچیق قورولسون،
شاه بولاغین آخار اولسون.
کورلوق چکمهسین ائللرین،
داغلاردان داشسین سئللرین.
آغ بنیز ساری تئللرین،
بایغین - بایغین باخار اولسون.
الله قوروسون زنگانی،
سنه بخش ائتسین ائلخانی.
جوانلارین غیرت کانی،
ایلدیریم تک شاخار اولسون.
قلبیمی بوردا قویلادیم،
قامتینه بوی بویلادیم.
گؤزهللرینی هویلادیم،
دؤنوب جانیم یاخار اولسون.
زنگان لوحهلری - ص 10 .
یوللاری یوروب گلمیشم،
گزه - گزه، سینله داغلار.
گول چیچکلر گتیرمیشم،
اتگینه چینله، داغلار!
اوزاقلاردا توزوم قالدی،
دؤران منی ظولمه سالدی،
یاریمی الیمدن آلدی،
یاغی گلدن کینله داغلار!
ائل منیم دردیمی بیلدی،
گؤزلریمدن یاشی سیلدی.
صولتیم انکار ائدیلدی،
سن ده آغلا، اینله، داغلار!
یاد گؤزونده سؤزوم اوخدور،
غمیم وار، سئوینجیم یوخدور.
دوزگونون نیسگیلی چوخدور،
آل کؤکسونه دینله، داغلار!
قاشقایی لوحهلری - ص 29 .
من دوزونه قدم باسدیم،
یاشا سنی، یاشا یایلاق!
یوللارین نفسین کسدیم،
یاشا سنی، یاشا یایلاق!
آرزو ائدیردیم اوشاق کن،
اوینایاردیم داغلاریندا.
قسمت اولدو گؤروم سنی،
عؤمرومون سون چاغلاریندا.
سندن کؤچن آغیر ائله،
باشیم اوسته تاج دئمیشم.
قاشقایی تک ائلیم واردیر،
دگیلم محتاج، دئمیشم.
دوزگونم من، صاف عشقیم وار،
چشمهلرین سایاق آخار.
سهندین اوجا باشیندان،
حسرتله «دنا»یا باخار.
قاشقایی لوحهلری - ص14 .
بيز احسان شكرخدا و ائلدار صديق ايكيميز بيرليكده «حسين دوزگون»ون شعرلري و ادبياتي يازيلاري و اونون باره سينده اولان شعرلري و ادبي يازيلاري بو وبلاقدا سيزه سوناجاغيق. اوميد ائديريك لذت آپاراسيز.