آچیق مکتوب - حسین دوزگونون شعرلری
خیالیمین قوشو قاناد آچاراق،
یئنه اوچماق ایستیر سرحدن قیراق.
گئده دوغما قارداش کرکوک ائلینه،
خلق شاعیرلریندن آلا بیر سوراق.
دیلهییرم سرین بیر نسیم اسه،
سلامیمی سرپه «صلاح نورسه».
«محمد عزته»، «عثمان مظلوما»،
شانلی بایاتلاردا گؤرسه هرکسه.
الیمده قلمیم وار، اوراقیم وار،
کرکوکو گزمگه اشتیاقیم وار.
من کی قارداشیمی اونودمامیشام،
کؤنول تینجیقدیران بیر فراقیم وار.
وطنیمه منیم باغلیدیر کؤکوم،
بیلیرم یاماندیر، آغیردیر یوکوم.
کودتالار ایچره نئجه بوغولور،
آزادلیق حسرتلی منیم کرکوکوم.
وطندن وطنه گله بیلمیرم،
بیر لحظه اولسادا گوله بیلمیرم.
شاهنشاه خلقیمی زالوتک سورور،
آنالار گؤزونو سیله بیلمیرم.
قان آخیب بورادا داغدان درهدن،
شهیدلر مزاری آشیبدیر حددن.
بس منیم حالیما کیم یانسین قارداش،
وطنیمدهیم من وطنسیزم من.
دوتمازمی بیر قارداش قارداش، سوراغین؟
قورتارمازمی قورتلار الیندن جانین؟
هئچ بیلیرسن نهلر گلیب باشینا،
بو مبارز ایگید آذربایجانین؟
سیزه بسلهمیشم درین محبت،
بودا بیر وئرگیدیر، وئریب طبیعت.
اوچ زادا باغلیدیر اصیل صنعتکار،
خلق، وطن سئوگیسی، بیرده صداقت.
قارداشیم کؤنلونه خلقین گل آخاق،
گلجهگه درین ایناملا باخاق.
پولاد بیلکلرله قیویلجیملاردان،
خرمن- خرمن آتش تؤرهسین، چاخاق.
اومیدین قورویاق آج یالاواجین،
آرزو دیلهگینه قالاق محتاجین.
قارداشیم گل منیم توت قوللاریمدان،
بدنیمده واردیر ایزی قیرباجین.
منیم اورهگیمده قیزدیر الیوی،
اگلنجه ائیلمه گؤزهل دیلیوی.
دئمیرم سن باشقا ائللری سئومه،
آنجاق کی پرستش ائت اؤز ائلیوی.
اورهگیمده منیم اودلار سؤنمهمیش،
خلقدن باشقاسینا هئچ دؤیونمهمیش.
شاعیر قارداشلاریم بیلیرلر بونو،
اصیل بیر صنعتکار خلقدن دؤنمهمیش.
قارتال تک گؤیلرده سوزه بیلمیرم،
شعیر اینجیلرین دوزه بیلمیرم.
بیلمیرسنسه قارداش، آگاه اول گیلن،
اؤز آنا دیلمیده یازا بیلمیرم.
قفسه سالیبلار منیم تک شئری،
من قیرا بیلمیرم، تکجه، زنجیری.
قورخورام او زمان هایلایاسان کی،
قارداشین اولمایا داها دای دیری.
قولاغیوی شاخلا منه آجومرد!
بوراسیندادیرکی بیر ده بؤیوک درد.
پولاد قوللاریما اودلو زنجیری،
سالمامیشدیر آنجاق یالنیز بو نامرد.
من اؤزوم چئورهمه قفس سالمیشام،
اسکی خولیالارا آ واه! دالمیشام.
یادلارین وئردیگی کوچوک قولچاقلا،
عجبا گؤر نئجه مشغول اولموشام.
قانمامیشام عصرین واقعیتین،
آنمامیشام سیررین من طبیعتین.
یئنی عصره اویغون مفکورهلردن،
قاچمیشیق، قاچیردیب ائل محبتین.
سارپیلیب وجودلار خولیا ایچینده،
عقلیمیز گئدیبدیر بیر- بیر بیچینده.
بیلمیشیک صنعتکار اؤزموزو، لیک،
شعری گزمیشیک بیر قیزین ساچیندا.
خیال ائیلهمیشیک هر نه وار بیزده،
بیلمهمیشیک نهلر گئچیر تبریزده.
قارداش بیز اسیریک، بیر سؤز یوخ، آنجاق،
اسارت سیرریمیز اؤز ایچیمیزده.
آرادان قالدیراق گل بو نؤقصانی،
دویوبان آنلایاق یئنی زمانی.
مبارزلیک ایله اؤزوموز هئچ کی،
قورتاراق بندلردن بوتون دونیانی.
خلقیمیز قارنی آج، اگنی چیلپاقدیر،
منلیگی ساتیلمیش یالین آیاقدیر.
عجبا قلمی صنعتکارلارین،
نییه بس آتشدن، قاندان ایراقدیر؟
عزیز قارداشلاریم قاپی باغلیدیر،
منی قینامایین سینهم داغلیدیر.
دئدیگیم بو کلمه افسانه دگیل،
گلهجك گونلرین شیرین ناغلیدیر.
خلقی راحات نئچه ایگید یاشادار،
یالان اولمالی کی اؤگود یاشادار.
دونیادا بیر گئرچک وارسا، بودورکی،
انسانی بیر ایش، بیر امید یاشادار.
من اونودمامیشام اسارتیمی،
دگیشمهمیشم اؤز طبیعتیمی.
گؤردوگون او جوشغون دیللی آصلانام،
بوراخمایاجاغام حقیقتیمی.
ایندیده بیز دایم جمه گلیریک،
آنجاق قورتولوشا نقشه چکیریک.
کؤک آغاجی قارداش امپریالیزمین،
بیلیرسنمی پوکدور، چوخداکی چوروک.
ازلدن اولموشدون سن منیله یار،
دادیما یئتیش کی اولدوم گیرفتار.
اؤزون کی بیلیرسن، ای دوغما کرکوک!
منیمده یوکسلمیش بیر تاریخیم وار.
یابانجی باخماییر شانیما منیم،
قارا ایزلر سالیر قانیما منیم.
بیلیرسن آی قارداش! قفسده نئجه،
ایلانلار بوراخیر جانیما منیم.
بورادا بویلانمیش اوغوزلار بویو،
دده قورقود بوردا سویلامیش سویو.
بیلیرسن اؤزون کی قوجا تبریزین،
نه گلمیش باشینا تاریخلر بویو.
بوردا بولانیق سو آخان دگیلدیر،
کیمسه بیر جومردی ییخان دگیلدیر.
بیلیرسن اؤزون کی آذربایجانلی،
کرپیچ آراسیندان چیخان دگیلدیر.
انسانلار بیر- بیره ازلدن یاردیر،
منه ده، سنه ده بو دونیا داردیر.
بیلیرسن کی منیم وورغونوم، رضام،
مشفقم، راحیمیم، صائبیم واردیر.
هچ بیلیرسنده کی ایندی بو زمان،
منیم احوالیم چوخ یاماندیر یامان؟
حبیب ساهیرلریم، جوشغونلاریم چین،
یالقیزلیق اؤلکهسی اولموشدور مکان؟
وطنیمی منیم قوردلار آلیبلار،
قیزیلجا گوللریم بیر- بیر سولوبلار.
آذر اوغلولاریم، مدینهلریم،
آیریلیق دوشگونو ایندی اولوبلار.
دوزگونم، آی دوستلار! دوشموشم اوزاق،
یوخدور سیزدن باشقا منه بیر دایاق.
استقبال نغمهسین قالدیر گؤیلره،
کرکوکلو کرکوکه گلهجك قوناق.
کیچیک شعرلر - ص 44 - 22 مرداد 1347 - تبریز .
حسین محمدزاده صدیقین شعرلری (دوزگون) - ایکینجی وبلاگ
بيز احسان شكرخدا و ائلدار صديق ايكيميز بيرليكده «حسين دوزگون»ون شعرلري و ادبياتي يازيلاري و اونون باره سينده اولان شعرلري و ادبي يازيلاري بو وبلاقدا سيزه سوناجاغيق. اوميد ائديريك لذت آپاراسيز.