حبیب ساهره مکتوب - حسین دوزگونون شعرلری
سئوگی سئچمکده من اینان چاشمارام،
کؤنلوم قاپیسین هر کیمه آچمارام.
سنی من سئویرم صحبتین اوچون،
دوزلوگه وئردیگین قیمتین اوچون.
سن منیم آنامی یاددان قورودون،
بو یولدا اوساندین جاندان چورودون.
خلقیمه بسلهدین درین بیر اینام،
محبت دفترین ائیلهدین تامام.
مقاما شهرته سن آلدانمادین،
یالتاقلار تکی اؤز ائلین دانمادین.
سارایا شاهلار قوشما یازمادین،
آغیر گونلرینده یولدان آزمادین.
یاد ایشکنجهسیندن دیزه چؤکمهدین،
حققی سئومکدن سن الین چکمهدین.
خلقیوین اوغروندا اؤز وظیفهنی،
یئرینه یئتیردین بیر اوغول کیمی.
حقلییم من سنی سئوسم نه قدهر.
قولاق وئر کئچمیشدن وئریم بیر خبر:
من بو شن دونیادا حله یوخ ایکن،
وطنیمده گونش دوغولدو بیردن.
آغیر بیر توفاندان کئچمیش شفقلر،
قیزیلا بلهدی یوردو نه تههر!
آذربایجان اوغلو حققینه یئتدی،
بیرهر – بیرهر شاهلیق ایزلری ایتدی.
باشلادی سعادت بیناسین قورا،
سعادت نغمهسین یازیب اوخویا.
چیخدی چوخ شاعیرین اوندا آدلاری،
فطرتلر، امیدلر، و باشقالاری.
قاباقجا سارایی سوسلهین اللر،
ایندیده یازدیلار ملّته سؤزلر.
گونلر کئچدی، آیلار اؤتدو، ایل اولدو،
بیردن آذر آیی فیرتینا قوپدو.
یئنه یادلار بیزه حاکم اولدولار،
شئرلر مسکنینه بیر - بیر دولدولار.
یئنهده ملّتین حاققی ازیلدی،
«امید»لر سارایا یئنه دیزیلدی.
یئنه شاعیر گلیب یالتاقلیق ائتدی،
تنعّم ایچینده اؤزوندن گئتدی.
آنادیل، خلقلیک، تام ناغیل اولدو،
آنامین قوینوندا چیچکلر سولدو.
شاعیرلر یاد دیلین یوکسک دیل ساندی،
امپراتورلوغو حقلی ایناندی.
او زاماندان، بئله سن وطنیمده،
دایاندین، یورد سالدین اؤز چیمنینده.
آغیرگونه، سینیق لامپایا دؤزدون،
ائلیوه خلقیوه شعرلر یازدین.
دوزگون دویغولاری گؤستردین ائله،
مترقی سؤزلر گتیردین دیله.
«کؤشن» شاعیرینی نه یاد بیدادی،
نه سارای، نه دربار آلدادانمادی.
انکشافیمیزا چالیشدین بیزیم،
سن آچدیغین ایزدیر منیم ده ایزیم.
ایندی دۀ من سنی نئجه سئومهییم؟
نه اوچون یازماییم نئچین اؤگمگیم؟
ازلی محبت اودو سؤنرمی،
گئرییه تاریخین چرخی دؤنرمی...
کیچیک شعرلر - ص 38 - 10 / 12 / 1346 .
حسین محمدزاده صدیقین شعرلری (دوزگون) - ایکینجی وبلاگ
بيز احسان شكرخدا و ائلدار صديق ايكيميز بيرليكده «حسين دوزگون»ون شعرلري و ادبياتي يازيلاري و اونون باره سينده اولان شعرلري و ادبي يازيلاري بو وبلاقدا سيزه سوناجاغيق. اوميد ائديريك لذت آپاراسيز.