آی تک آری - حسین دوزگونون شعرلری
حله سن اوتایا یاددا دئییرسن،
دانیشاندا دا اؤز دیلین اگیرسن.
هئچ یادیمدان چیخماز، اؤیگویله دئدین:
«بیزه دیل نه لازم؟ ایتلین! گئدین!
تورکونون کی هئچ بیر ضابطهسی یوخ،
فارسینین حؤرمتی اؤلکهمیزده چوخ!»
دئدیم: «قارداش دیل کی وحدت یاراتماز،
انسان اولان کیمسه اؤز دیلین آتماز.
تورکو - فارسی نهدن گولشدیریرسن،
اگری اوگری بیر یول توتوب گئدیرسن؟
بولاندیرما آخان دورو بولاغین،
آلما الیندن سن ائلین دایاغین.
هر دیل اؤز خلقینه شیریندیر اونون،
دانشیدیغین سؤزون دوشون بیر سونون.»
دئدین: «قارشیلیریق سنی سئویریک.»
«بیزیم عالیمیمیز» سنه دئییریک.
«لاکین قورخوروق کی یادلار آپارا،
نقشهلر چکیرلر گؤر هاردان هارا؟»
سؤزون حؤرمتینی ساخلامادین سن،
دئدین منی هئچ واخت چاغیرماز وطن!
یاددا آدلاندیرین جان بیر قارداشی،
اوغلوم! اولماز ائلین اوباش بوباشی،
عشقی عقیدهده اینامدا آختار،
ایمانلی انسان اؤز شرفین تاپار.
قلبیم سوتک دورو، آی تک آریدیر،
جیسمیمی آغاردان نورو ناریدیر...
اردبیل لوحهلری – ص 23 .
دکترحسین محمدزاده صدیقین شعرلری (دوزگون)- ایکینجی وبلاگ- کلیک ائدین
بيز احسان شكرخدا و ائلدار صديق ايكيميز بيرليكده «حسين دوزگون»ون شعرلري و ادبياتي يازيلاري و اونون باره سينده اولان شعرلري و ادبي يازيلاري بو وبلاقدا سيزه سوناجاغيق. اوميد ائديريك لذت آپاراسيز.