بولود آغلار یاغیشلار،

یئره یاغیش باغیشلار.

یاغیش یئره دانالار،

یئر جانینا قان آلار.

قانین رنگی قیرمیزی،

من سئومیشه‌م  بیر قیزی.

یاناقلاری آلما تک،

گؤزلری پیالا تک.

منله سئویب - سئویشدی،

کوسوب یئنه باریشدی،

گؤردوم اونو باخچادا،

گول ییغیردی بوخچادا،

بوخچا گولو سولارمیش،

درد جانیما دولارمیش،

رنگیمی درد ساراتدی،

گونلریمی قاراتدی.

گونلریم گونشلیدی،

اوره‌گیم آتشلیدی.

گونش باتدی دونیادا،

آتش سؤندو داخمادا.

اوچغون داخمام قارالدی.

قیز منی عشقه سالدی.

عشق یامان اولارمیش.

عشقه دوشن سولارمیش.

عاشیق اولدوم باهارا،

کؤنلومو باسدی یارا.

یارا، هجران یاراسی،

تاپیلمازمیش چاراسی.

قوشلاریله اؤتوشدوم،

چاراسینی سوروشدوم.

قوشلار دئدی:«‌‌ای عاشیق!

گئت عشقینده، اول صادیق!

دردین سؤزون یارداندیر،

یار اولماسا، هارداندیر؟»‌

اوچغون داخما - ص 46 - 1346.

دکتر حسین محمدزاده صدیقین (دوزگون) - ایکینجی وبلاگی باخین