ساری بولبول - حسین دوزگونون شعرلری
غملر سنی جانا گتدی،
رنگین اولدو ساری بولبول.
قلبین ظالیم قیش آولادی،
گل آغلاما باری بولبول.
کؤکسونده اودلاندی اورهک،
گولونج اولور بوردا ایستهک.
هانی کئچمیش زامانلار تک -
باخچالارین باری بولبول.
نییه سئچدین سن ظولمتی،
قبول ائیلهدین ذلّتی؟
بیلمیردین بو حقیقتی،
قیشین اولماز عاری بولبول؟
قارا بولود یان گئدهجک،
قهرمانلار قان ائدهجک.
گون داغدان قالخیب گلهجك.
اریدهجک قاری بولبول.
عاشیق ترپهدجک سازی،
قالدیراجاق خوش آوازی.
گؤرهجکسن یایی – یازی،
اؤیهجکسن یاری بولبول.
بیلیرم آخر یاز گلر،
گونش یئره نور سرپَلر.
یئنه گوللر عشوه ائیلر،
ائیلمه چوخ زاری بولبول.
گیرریک قیزیل گول باغینا،
بنفشهلر اویلاغینا.
یئتر یارین قولاغینا،
سن سیزیلدات تاری بولبول.
دوزگون دئییر دؤنهجک ایل،
یاناغیندان قان - یاشی سیل.
سازی گؤتور آچ گیلن دیل،
اوخو اوخو ساری بولبول.
کیچیک شعرلر - 12 / 11 / 46 هریس - ص 31 .
بيز احسان شكرخدا و ائلدار صديق ايكيميز بيرليكده «حسين دوزگون»ون شعرلري و ادبياتي يازيلاري و اونون باره سينده اولان شعرلري و ادبي يازيلاري بو وبلاقدا سيزه سوناجاغيق. اوميد ائديريك لذت آپاراسيز.