منی هارا آتیرسان سن؟ - حسین دوزگونون شعرلری
شاعیر دوستوم، دایان حله،
الیم بیلمیر یورولماغی.
منی دینله، منی دینله،
بیلیرسن کی اؤزون بئله.
چوخ آجیدیر بیر شاعیرین،
تک اولماغی، تک اولماغی...
داغ دؤشونون بولاغی تک،
من گؤزلردن آتیلمیشام.
سانیلماییر بوردا امک.
آیاق اوسته دورام گرهك.
ایللردیر دوشمن اوخونا،
دوتولموشام، دوتولموشام...
منیم شعریم، منیم سؤزوم،
ائللریمه چاتماییبدیر.
انتظاردا سوسوب گؤزوم،
قارالیبدیر هر گوندوزوم.
یاد ائللینین یالانی دا،
اورهگیمه یاتماییبدیر...
اؤز یوردومدا، اؤز اوبامدا،
غریب گزیب دانیلمیشام.
قلمیمدن کاغیذلارا،
یاش تؤکموشم داملا - داملا.
بودور نرون، بودور فرعون -
آتشینده یانیلمیشام.
عشقی مقدّس شاعیرم،
سینهمده وار قیزیل اورهک.
بورا منه اولوب وطن،
منی هارا آتیرسان سن؟
نئجه یوموم من گؤزومو؟
بیر دونیا وار بوردا دیلک...
کؤنلوم ائوی اولوب برباد،
قولاق وئرین سیز آ دوستلار:
حددن آشیب ظولم و بیداد.
یئرسیز من چکمیرم فریاد.
ائل نیسگیلی بیر شاعیری،
بیلیرسیز نه حالا سالار؟...
کیچیک شعرلر - ص 47 .
بيز احسان شكرخدا و ائلدار صديق ايكيميز بيرليكده «حسين دوزگون»ون شعرلري و ادبياتي يازيلاري و اونون باره سينده اولان شعرلري و ادبي يازيلاري بو وبلاقدا سيزه سوناجاغيق. اوميد ائديريك لذت آپاراسيز.