ائل نيسگيلي- حسین دوزگونون شعرلری

تبریزین ارکی نین آیاغی آلتیندا

اردبیلدن گلن گؤزل بیر جوان

سریلدی یئره.

ایکی آغ گؤیرچین

باشی اوستونده

قوپدو ارکین سؤکوک- تؤکوک بؤیرونه.

بیری دئدی:

- باجی!

باشقاسی سؤیله‌دی:

- باجی! جان باجی!

سؤیله سؤزون باجی، باشیمین تاجی!

- بیلیرسن ارکیمین، قوجا ارکیمین

آیاغی آلتیندا ییخیلان کیمدیر؟

تورپاقلار اوزه‌ره سریلن جوان

بو ایگید اوغلان؟

- یوخ، بونو بیلمیرم!

کیمدیر سؤیله گؤروم؟

- اردبیلدن گلمیش عاشیق ایگیددیر،

یارالانمیش قلبی، مجروح سینه‌سی

کسیلمیش نفسی، باتمیشدیر سسی!

درمانی تاپیلمیر، درمانسیز قالمیش!

- قانادیمدان ایندی بیر پر سالارام

کاشکی اوغلان اونو گؤتوره بیلسین

ایشیقلی دُنیایا اوزونو توتسون

سینه‌سی‌نین قانین پریمله سیلسین ...

تبریز- 1357