لال اویونو - حسین دوزگونون شعرلری
- 1 –
منی چاغیردیلار
بیر ییغینجاغا
رسمی ییغینجاغا
ها!
اؤزوده اردبیلده
«فدک» تالاریندا
همده یالواردیلار:
«گل اوستاد بیر مقاله یاز
عباسقلی یحیوی اوچون.»
دئدیم گؤزوم اوسته
یازارام والله.
- 2 –
یازدیم چوخدا گؤزل،
چوخدا مکمّل!
گؤندردیم منه
« - یاز!»
دئین قارداشا.
یالواران هاماشا.
اودا،
مندن تشکّر ائتدی.
«- کیچیگم»،
«- نؤکرم»،
و نهلر دئدی!
- 3 –
گون او گون یئتیشدی
سفره چیخدیم:
اوچاق اردبیلین
گؤیون دولاندی.
اورهگیم چیرپیندی
کؤکسوم اودلاندی.
دئدیم: آمان الله
لعنت اولسون سنی
تانیمییانا.
منی چاغیرمیشلار
ییغینجاغا، ها!
اوشاق تک سئوینیب
اویناییردیم من.
گؤزوم اؤنوندهیدی،
سئوگیلی وطن.
دویونجا دولاندیم،
گزدیم،
آرخادا، بری ده،
خاطرهلر یاتاغی
کوچهلری ده.
«سرچشمه»ن گئتدیم
«اوچ دوکانلار» ا
«باغ مئشه»دن آخدیم
لاپ «هفتهوانا»
«قالا قاباغیندان»
«شاه باغی» یانیندان،
«بالیقلی»دان اوزاق،
دای هارا، هارا.
- 4 –
یاغیشین آلتیندا
سحر زمانی،
گون اورتایا یاخین
دوزهن قورولدو.
«اهل بیت» شاعری
اوچون دوردولار
«تندیس» قوردولار.
منهده بیر کتاب
وئردی او قارداش
دئدی:«- بودور اوستاد
سنین مقالهن
لاپ باشدا . . . »
- 5 –
آخشام آپاردیلار
«فدک» تالارینا.
گؤزل، یاراشیقلی
بؤیوک سالونا.
دوستلاریم بیر به بیر
منه ساری گلیب
قوجاقلاشدیلار.
همده یاواش- یاواش
پیچیلداشدیلار.
آی الله
رؤیامی
یوخودورمو بو؟
نئجه توپلاشدیلار
نئجه گلدیلر
منیم سئودیکلریم
منیم دوستلاریم.
گؤروشمک اونلارلا
سربستجهسینه
منه بیر شکرانه
بیر کرامتدیر،
بیزه ساری آخان
بو بیر نعمت دیر.
آتیلیب دوشوردوک
اوشاقلار کیمی!
بیری سوروشوردو:
«- کئفین نئجهدیر؟»
بیری شاشیرمیشدی:
«- اده، نه عجب! . . .»
باشقاسی دئییردی:
«- شیطانین قولاغی
کار اولسون!
دینمه!»
دئدیم:
«- مقالهمی ده چاپ ائیلهییبلر.»
بو سؤزدن دوستلاریم
لاپ شاشیردیلار.
- 6 –
«رئیس»لر گلدیلر
قورقو قوردولار.
اونلار نه عالمدهیدی
بیز نه عالمده!
دله دوزون بیری
امر وئرمیشدی
کتابی وئرمهیین
دوشسون اللره
آپارین، اوستادین
مقالهسین چیخارین،
آماندی . . .
وئرین سئللره!
- 7 –
«علسگر کی بوردا
دگیل!» سؤیلهدیم!
«دوشنبه»دنمی بورا
امرلر گلیر؟
«تاجیکستان» هارا
اردبیل هارا!
- 8 –
عباسقلی آقا
سنین روحون شاد،
غنی- غنی سنه
رحمتلر اولسون.
بونلار،
سنین آدیوا
یالان دانیشیرلار،
یالان دئییرلر.
دالیندا گیزلهنیب
دنیا زخارفین
یامان یئییرلر.
اما بیلیرم کی
سنده صفا وار
صداقت وار،
وفا وار ایدی.
وورولدون سن یالنیز
مظلوملوقلارا.
باخ کی بوردا، بوگون
لال اویونو اوینور،
بو نامرد قارداش.
منه یؤنهلیرلر،
بو اوباش، بیر باش.
- 9 -
بورانی دولدوروب
یالان، فیریلداق
کاشکی یالنیز منه
یالان دئسهلر!
لال اویونو سارمیش
بوتون حیاتی
سؤز دئمهگه
دیل یوخ
دیلهده قولاق.
وفادان
صفادان
نشان قالمامیش
ائل اویونجاق اولموش
وطن اویونجاق!
اورهگیم دولودور
گؤز یاشیم گلمیر.
آغلایان من اولوم،
قوی
ائل اولماسین!
گؤز یاشی ائلیمین،
دای سئل اولماسین!
اوغورسوز زماندا
گلدیم دنیایا.
سنی گؤر نه زمان،
گلمیشم سایا.
- 10 –
عُمرو باشدان باشا
آغلادین شاعر،
لاپ داش اورهکلری
داغلادین شاعر!
قوی من ده
آغلاییم
سنین وئردیگین
«رجز عاشورا» نوحهلرینه:
آی باتدی
صبح آچیلدی
زینب نوایا گلدی.
زهرا دئدی:
«- حسین وای!»
عالم صدایا گلدی.
اردبیل – 1389
بيز احسان شكرخدا و ائلدار صديق ايكيميز بيرليكده «حسين دوزگون»ون شعرلري و ادبياتي يازيلاري و اونون باره سينده اولان شعرلري و ادبي يازيلاري بو وبلاقدا سيزه سوناجاغيق. اوميد ائديريك لذت آپاراسيز.