ایران‌ین من جانلی بئینی، بئینین ده جانییام،

آذرستان مُلکونون بیر چاغلایان عمّانییام.

دینیم اسلامدیر منیم، قرآنی رهبر قیلمیشام،

ان گؤزل یول سئچمیشم انسانلیغین وجدانییام.

قلبیم آولاندی ازل گوندن مغان قیشلاغینا،

بو ائلین، بو ملّتین بیر دوشگونو، حیرانییام.

بیر شئیه هر کیم یالان یا دوغرو قربان سؤیله‌ییر،

من معارف شهری‌نین، من اردبیل قربانییام.

معنویت اولماسا، یوخدور حیاتین آنلامی،

ظاهرین آلتیندا گیزلی باطنین انسانییام.

شیخ صفی‌نین دیر قارا مجموعه‌سی مشعل منه،

یوللاری آیدینلادان بیر شعله‌ی نورانییام.

مصحفیم بیر الده، شمشیریم بیر الده، آتلانان،

خلقی تقوا دعوتی ایله جوشان روحانییام.

هر یالان قورقو قوران اوباشا احسن سؤیلمه‌م،

شاعرم، دوزگون تخلّصلو صداقت کانییام!