آی قالاسی - حسین دوزگون
قوزو اوتلور گؤی یاماجدا،
قارانقوش اوخور آغاجدا،
قیز، چؤرهگی یاپیر ساجدا،
یار قاییدیر اوتای یالدان،
آیریلیری قیز ملالدان.
گؤی پریسی بولود ساغیر،
یاغیش یاغیر آغیر – آغیر،
منیمده ائلیمی چاغیر،
دوراق سلاملی سمایا،
ناماز دۀ اولدوزا آیا.
داغ درهده چای بورولدو،
هر یاندا سویو دورولدو،
ائل گلدی ائولر قورولدو،
بیرجه منیم ائلیم قالدی،
گلمهدی گونوم قارالدی.
گورولدورو جوشغون سئللر،
قیژیلدیری ایتی یئللر،
گئدین دئیین کؤچون ائللر،
قیش گلدی غملر اوجالدی،
داغلار آغاجلار قوجالدی؟
گونش ساچیر، هاوا سازدیر،
چشمه باشی قوشدور قازدیر،
یامان گونون عؤمرو آزدیر،
یامانلیق بیر ماتاه ساتماز،
یاخشیلیغی کیمسه آتماز.
اویناییری دوزده جیران،
قاوزانیری یالدا داوشان،
دایانماییر نازلی مهمان.
گؤرونمهمیش تئز ساووشور،
هجرینده کؤنلوم قاووشور.
آداخلی قیز خوش آوازلی،
قاش موغانلی گؤز شیرازلی،
خومار - خومار، نازلی - نازلی،
اوغراییر بولاغا ساری،
یال تپهده دوروب یاری.
یاز گونشی قار اریتدی،
قوجالیغین آغاج سیلکدی،
بایرام گلدی، بوز آی بیتدی،
سنین بایرامین نه کاسدی،
باختیمین آیناسی تاسدی.
گونش سحر مولک آلاندا،
لالهلر تندیر سالاندا،
بومباردوماندا، تالاندا،
قول آدیله آلدی دوشمن،
هیجقیرتییا سالدی دوشمن.
ملعون قاری هاوارلادی،
لاپ قاپیدا دادارلادی،
برک بئلینی دونقارلادی،
ایکی گؤزونو برهلتدی،
بو حالا منی او گتدی.
بایرام واختی موغان یوردو،
موغان یوردو، جانان یوردو،
سن کی یوخسان فغان یوردو،
دوشمن بیزی درده سالدی،
شادلیغیمیزی او آلدی.
کؤنول دؤزمور آیریلیغا،
فلک نئچین ائدیر جفا؟
هاچان بیتر بو ماجرا،
کؤنلومو هیجران داغ ائتدی،
وار-یوخومو غم داغیتدی.
بوز آی بیتدی شاختا آشدی،
کول دیبیندن داوشان قاشدی،
کؤچ زامانی یاخینلاشدی،
آی قالاسی باخ اوتایا
سلام وئرائله اوبایا.
آی قالاسی داشلی داشلی
گونش ساچیر ساشلی ساشلی
ایگی گؤزوم قالیب یاشلی
ائللر یاریما یار اولسون،
یارین یولو هامار اولسون!
آی قالاسی! ائللریوه،
تئز ساوولان یئللریوه.
داش آشیران سئللریوه،
سؤیله منیم احوالیمی،
دئینه بو غملی حالیمی.
گونش ساچاغین آتیبدی،
ائللر هامیسی چاتیبدی،
یار ائلی هاردا یاتیبدی،
آی قالاسی! یارحالین وئر،
باخ اوتایا احوالین وئر.
چایلارین چشمهن آخاندا،
گونش داغلاردان باخاندا.
خیش - آلاتلاری تاخاندا،
ائل ساوولار قاتار – قاتار،
یار، یارینی بوردا تاپار.
آی قالاسی ظولوم قالدی،
نئچون جفاکار اوجالدی؟
یاریمی کیم قیراق سالدی؟
گؤزوم حله یولوندادیر،
ساغیندادیر، سولوندادیر.
آی قالاسی! صفا بسلر،
انسانلاری وفا بسلر،
فلک نئچون جفا بسلر؟
قارقینمیشا وفا اؤیرهت،
وفا، وفا، وفا اؤیرهت!
بولود بوز آیدا جالانار،
سو گؤی بوز اوسته قالانار،
دالغالاری چالخالانار،
دلیک آچار سوزهر آلتا،
خیردا بوزو دوزهر آلتا.
یورد گؤستهرن دوران زمان،
آلاچیغی قوران زمان،
دیرهک یئره ووران زمان،
بیر قوش اولوب من اوچایدیم،
تئز سنه ساری قاچایدیم.
ائل یوکو کؤچده قالانار،
دوهده تای ییرغالانار،
قیزین سهنگی جالانار،
اوغلان آوجون آچار ایچر،
کؤنلونون غمینی بیچر.
اوزالداندا گؤی قورشاغی،
قار باساندا باخچا – باغی،
چن دوتاندا تپه داغی،
باخ دوتغون قارالتیلارا،
دئییرلر ائللر اورادا.
آی قالاسی داغ ترهسی،
جنگل کندینین درهسی،
آی نه یاماندیر برهسی،
یول تاپ گئدیم جنگله من،
نبینی تاپیم او کنددن.
یاز گونلری نظام- نظام،
ائللر سنه یوللار سلام،
اللریندهده دولو جام،
یاللارین دؤشون سولانار،
دؤورهوی چایلار دولانار.
آی قالاسی! یازدا بیتدی،
گلمهدی یار، گویا ایتدی،
دئییرلر بیر دیبلی گئتدی،
بیرده دا گلمز بورایا،
بئلنچیک محنت سرایا.
آی قالاسی! سؤیله یارا،
گؤزهل کهلیک باتدی قارا،
ساغالسایدی هر بیر یارا،
دیل یاراسی هئچ ساغالماز،
بیر آن بئله راحات قالماز.
شاخدی گؤیدهکی قونودلار،
گؤیهردی جوشدو بولودلار،
سئل - سولارا دوشدو قوردلار،
شاققیلداسین قوی سئللرین،
چیگنیوه دوشسون تئللرین.
سنده بیتر گول یاسمن،
باغیشلارام جان سنه من،
جان نهدی؟ هر بیرزاد سن- سن،
آی قالاسی صفا یوردو،
صفا یوردو، خدا یوردو.
قیز بئچهنی کیشلیهنده،
نهرانی گون دیشلیهنده،
دگیرمانی ایشلیهنده،
باخ اوتایا سلام گؤندهر،
نیسگیل دولو پیام گؤندهر.
آی قالاسی! چشمهن آخسین،
دیوارلارین هایلا شاخسین،
گؤزهللرین سنه باخسین،
سنه هامی حیران اولسون،
سندن کئچن جیران اولسون.
آی قالاسی! چیخ سمایا،
دردلریمی سؤیله آیا،
کؤنلومه اول محکم پایا،
درد - غملر یوخسا ییخدی،
قارا گونلر اونو سیخدی.
آی قالاسی! جان پاراسی،
گؤزومون آغی قاراسی،
کور اوغلونون گهواراسی،
دوشمه قیراق اؤز جانیندان،
شانلی آذربایجانیندان.
نوجهدهه یا ناهرانا،
تازاکنده، گوراوانا،
ناها، اندیزه، هریانا،
سن لیجیملی گؤزهتچی اول،
اونلارا وئر بیر آچیق یول.
آی قالاسی! آزاد اولسون،
قددی بویو شمشاد اولسون،
بوتای کندلر آباد اولسون،
بوردادا مکتب آچیلسین،
کیتابلارا گون ساچیلسین.
آی قالاسی! وئر نفسین،
سسلندیر ائللر جرسین،
آت دئنه، دونیا هوسین،
انسان گرهك پاک یاشایا،
دئولر یئتیرمز هارایا.
آی قالاسی! نار بیتیرسین،
دؤرد بیریانی بار گتیرسین،
قیش داغیلسین، یاز یئتیرسین،
راحات بوردا قوی یوخلاییم،
قاراوولوم سن اول داییم.
آی قالاسی! سرین اولسون،
چشمهلری درین اولسون،
صفا عاشیقلرین اولسون،
عشق اودونا اورهک یانسین،
هر بیر کؤنول دردی قانسین.
آی قالاسی! گؤیلر شاهی،
عاشیقلرین قبلهگاهی،
ائللریمیزین کولاهی،
سن یاشا دونیا بویونجا،
کؤنلومه اود وور دویونجا.
چاتدی باشا روزگاریم،
آل بو اورهک یادگاریم،
اولسا منیم اختیاریم،
گؤیلرین باشین اگرم،
سجدهوه ساللام گئدهرم.
ساغلیغینان قال، خوش یاشا،
باش آپار اولدوزا آیا،
گئتمهلی اولدوم قیراغا،
گؤرنمهسم آتما منی،
من کی اونودمارام سنی.
اوچغون داخما – ص74 - یای 1343 - تبریز .
بيز احسان شكرخدا و ائلدار صديق ايكيميز بيرليكده «حسين دوزگون»ون شعرلري و ادبياتي يازيلاري و اونون باره سينده اولان شعرلري و ادبي يازيلاري بو وبلاقدا سيزه سوناجاغيق. اوميد ائديريك لذت آپاراسيز.