سنینکیدیر - حسین دوزگونون شعرلری
آنا،
کؤرپه واختلاریمدا،
بئشیگیمده یاتان زامان،
لایلا چالدین حزین سسله،
نغمهلرله یوخو آلدیم،
رویالاردا سئیران قیلدیم.
ایمکلیگه، ایمکلیگه،
تا آتیشدیم یئریمگه،
«تاتی - تاتی بالا»،
دئیه،
نغمه قوشدون، قوشما دئدین،
اوخشامالار گوللندیردین.
قیشدا آغیر گئجهلرده،
تاپماجایلا، شعرلرله،
ناغیللارلا باشیم قاتدین.
قوشما دئدین پرده پرده.
منده اولان بو شلاله،
هیجانی سن اویاتدین،
جور به جوره سؤز اؤیرتدین.
یاغیش یئره داملایاندا،
قیش اؤتولوب یاز چاتاندا،
اولدوز سوزوب آی باتاندا،
قیزاراندا داغدا باتی،
غملر هیجوم ائیلهینده،
گؤزلریندن یاش داملادین،
کؤنولوندن سؤز، بایاتی،
منی قیلدین دردله آشنا.
بوی آتدیقجا، افتخارلا،
بویوما سن بوی بویلادین.
منه جوراب توخویاندا،
کورسوده باغرینا باسیب،
عزیزلیکله سوی سویلادین.
بئلهلیکله بویا چاتدیم.
یئنه سؤزدن ال اوزمهدین،
جاوان واختیم چاشان زامان،
سؤزله منه اینام وئردین،
اینجیتدیمسه چوخدا سنی،
دوداغین هئچ واخت بوزمهدین.
اورهگیمین زمیسینده،
آنا، شعرین توخمون سپدین.
اؤز اوغلونو شاعیر قیلدین،
اینجه قلبه، سؤزه مالیک.
آنا، شعریم بس دئمهلی،
سنینکیدیر، سنینکیدیر.
آنا، منیم سؤز دؤلتیم،
سنینکیدیر، سنینکیدیر.
قوربان اولسون شعریم سانا،
ای هونرلی بیلگین آنا.
سؤز دؤلتیم قوربان سانا،
اؤزوم آنا، گؤزوم آنا...
زنگان لوحهلری - ص 74 - 5 / 1 / 47 - تبریز .
دکتر حسین محمدزاده صدیقین (دوزگون) - ایکینجی شعر وبلاگینه باخین
بيز احسان شكرخدا و ائلدار صديق ايكيميز بيرليكده «حسين دوزگون»ون شعرلري و ادبياتي يازيلاري و اونون باره سينده اولان شعرلري و ادبي يازيلاري بو وبلاقدا سيزه سوناجاغيق. اوميد ائديريك لذت آپاراسيز.