اۆلگۆ
آرزوم بو ايدي جنت ائديم باشدان آياغا،
هر بير كۆچهوي، هر برهوي، دؤنگهوي تبريز.
سن آرزو ائديردين بشريت ياشاسين شن،
منده ديلهييرديم سنه شن گۆنلري تبريز.
آلدي غرور حسي مني تبريزلي سؤزۆندن،
گزديكجه بۆتۆن دۆنيالاري، هر يئري تبريز.
هئچ كيمسهده يوخ سنده اولان صير - صيفت اصلا،
انسانليغا آچديم بۆتۆن اسطورهوي تبريز.
تا دۆنيادا قانون يارادان هر كس اوتانسين،
آلسين اؤزۆنۆن بئينينه مفكورهوي تبريز.
سندن هامي هر اؤلكهده تقليد ائلهسينلر،
گلديم قرارا، شاهه چكم نغمهوي تبريز.
اۆلگۆ يارادام هر يئني نسله آنا، سندن،
دۆنيايا يايام پاكليغيوي سلقهوي تبريز.
قوي قافيهلر هپ غلط اولسون، نه ايشين وار،
دۆز سؤز، دۆز اينام قوي بۆرۆسۆن دؤورهوي تبريز.
تبريز يوللاريندا / ص 29.
+ نوشته شده در پنجشنبه نوزدهم مرداد ۱۳۹۱ ساعت توسط سید احسان و ائلدار
|
بيز احسان شكرخدا و ائلدار صديق ايكيميز بيرليكده «حسين دوزگون»ون شعرلري و ادبياتي يازيلاري و اونون باره سينده اولان شعرلري و ادبي يازيلاري بو وبلاقدا سيزه سوناجاغيق. اوميد ائديريك لذت آپاراسيز.