معلملریم
تبریز سؤزو قولاغیما دهگنده،
جانلانیر گؤزومده معلملریم.
«حکمت مدرسهسی»، «لقمان»، «فیوضات»،
«دانشسرا» گلیر خیال ائوینه.
منه غرور وئریر بو آد، بو حیات،
اؤزومو تبریزلی کیمی گؤرهنده.
کیتابخاناسیندا «تربیت»ین من،
گؤرورهم اوتوروب «امیر شقاقی».
اونلا اوخویارکن «گلشن راز»ی،
اؤتورم کئچیرم بوتون آفاقی.
منه اوخوتدوران «عقد الفرید»ی،
بورادا اؤیرهدن «برهانی» هانی؟
معناسی تبریزین «مشکوة» دیرمنه،
اوخویوب سئودیگیم «معراجنامه» دیر.
گؤزلریم اؤنونده او مرد کامل،
«آقا میرزا عمران»، «شرح لمعه»سی،
«منطق کبری»سی، بیرده «عوامل».
بیرده اوزدن ایراق، ائلینی دانان،
چؤرهک - چیراق اوچون بعضی آلدانان.
عالیم نومالارا، نئجه دئییم من:
معلیم!
بیلیرم،
اذن وئرمزسن،
سن، آنا تبریز!
تبریز دانشگاهی هلهده سنین،
خور باخیر دیلینه، اولماز آناجان!
«فضولی»سیز «نسیمی»سیز یاشاماز،
«معجز» سوز اولانماز کی آذربایجان.
هانی «نباتی»نین «راجی»نین آدی،
«یوسف خاص حاجیب» ین اولو فریادی؟
باشیم قالا دوشدو دانشگاهیندا،
کاشکی گئتمز ایدیم هئچده اورا من،
تئوریزه ائتدی علمین آدیله،
بیر سیرا یالانی، فیریلداقلاری،
دردیمی آپاریم بوردان هارا من؟
سنله دانیشماق چین سؤزوم چوخدور چوخ،
شیکایتیم وار بعضی معلیملردن،
طالعیمدن اصلا کوسگون دگیلم،
سنه دؤنهجگم بیلیرم وطن!
اؤزومو تبریزلی حسّ ائیلهینده،
منه غرور وئریر بو آد، بو حیات...
تبریز یوللاریندا - ص 25- 1356.
دکتر حسین محمدزاده صدیقین (دوزگون) - ایکینجی شعر وبلاگینه باخین
بيز احسان شكرخدا و ائلدار صديق ايكيميز بيرليكده «حسين دوزگون»ون شعرلري و ادبياتي يازيلاري و اونون باره سينده اولان شعرلري و ادبي يازيلاري بو وبلاقدا سيزه سوناجاغيق. اوميد ائديريك لذت آپاراسيز.