ایگیرمی یاش - حسین دوزگونون شعرلری
منله اکیلن آلچا آغاجی،
اگلهنیب باردان یئنه بوداغین.
ساللانیب یئنه تورش آلچالارین،
قاماشمیرمی بس سنین دوداغین؟
سنه وار منیم بیر خوش خبریم،
قولاق وئرگیلن دئییرهم دوزون.
آنام دئییرکی هر ایکیمیزده،
ایگیرمی یاشا دولموشوق بوگون.
آناما گؤره، من اولان گونده،
سن بوی آتیبان چیخیبسان دوزه.
منله یاشاییب منله قالیبسان،
منله دیل آچیب گلیبسن سؤزه.
سؤیله گؤروم بو کئچمیش ییرمی ایل،
اورهگینده سن نه بسلهدین بار؟
ایچدینمی هانکی دیلک شرابین،
قالدی گؤزونده هانکی آرزولار؟
سؤیله گؤروم بو کور یاشاییشا،
بیلدینمی نئچون گلیبسن آلچا؟
یانکیلرین هئچ قانلی الیندن،
بوکولموش قدین گؤردومو هاچا؟
سؤیله گؤروم بیر بو یاشاییشین،
دیبی هارادیر باشیسا هارا؟
بو حکومتدن هئچ اورهگینه،
دهگدیمی مینلر اؤلومجول یارا؟
هر ایکیمیزین عؤموروموزدن،
ایندی ییرمی ایل اؤتوبدور آلچا.
سؤیله گؤروم بیر ایستهکلریندن،
آچیبدیرمی نه قوینوندا قونچا؟
آلچا، طبیعت بیزی دوغارکن،
وارلیغیمیزا نه تدبیر قیلدی؟
آلنیمیزین کور نقطه - خطلرین،
کیملر اوخویوب، کیمسهلر بیلدی؟
آلچا درد - غمین ایز قالیقلاری،
سنینده پوزغون دهرینده واردیر.
ییرمی یاشیندا سنده قوجاسان،
سنینده اولما بو دونیان تاردیر؟
آلچا نه اوچون پوستون قارالیب،
ظولمت سنی ده باسقینلاییبمی؟
اولما اورهگین یانغین اولوبدور،
سورهرهک من تک مینلر درد - غمی؟
نه اوچون سنه رغبت گؤرونمور؟
نه اوچون تورشدور کؤنلونون باری؟
اولما ائللرین گؤزوندن سالیب،
سورگون ائدیبدیر سنیده تانری؟
گؤرورهم سنین بارین آغیرکن،
ان قیمتلیدیر داها زنگیندیر.
قول بوداقلارین زوردان اگلهنیب،
بو رغبت گؤرمز بارلار سنگیندیر.
سؤیله گؤروم بیر یاشیدیم منیم،
قالخاجاقسانمی آخر هاراجان؟
یورولوب، دوروب، قاییداجاقسان،
یا قاچاجاقسان آلچا یاراجان؟
آلچا دیشقاردان قوجاسانسادا،
حله گنجسن، حله جاوانسان.
تاتلی چیچکسن، طراوتلیسن،
تیکانلار ایچره مین گولوستانسان.
آلچا دۀ گؤروم دوغاجاقمی یوخ،
بورادا او شن او پارلاق گونش؟
قوربان آلاجاق مینلر پروانه،
کؤنلومده چاخان سؤنمز بو آتش؟
آلچا دۀ گؤروم یئنه قالاجاق،
دوداقلاریندا قورو سئودالار؟
بو دوزوکلردن یئنه سولاجاق،
قوینوندا آچان تازه ایلک باهار؟
دۀ گؤروم هاچان بیتهجک هجران،
چاتیشاجاقسان نه واخت یارینلا؟
ائدهجکسن بس هاچان آی آلچا،
هانکی آغیزی شیرین بارینلا؟
دۀ گؤروم هاچان اوستوندن گئدهر،
آغیر تپیکی یاد قوناقلارین؟
دۀ گؤروم هاچان شاد نغمه قوشار،
قوینوندا سیزان بو درتلی تارین؟
آلچا دئییرلر پاییز واختیندا،
سنین تورش بارین چوخ شیرین اولار،
دهریسی پارتلار، بال چؤله پیرتلار،
دونون باش-آیاق قیرمیز بویانار،
سنین ال چاتماز بوداقلاریندا،
قیزیل بایراقلار یئلکن قالدیرار،
بیر اوشاق سالار بیر - بیر داش ایله،
سونرا اوستونه آغیر قار یاغار.
کیچیک شعرلر - ص136 - 16 / 4 / 1344 .
بيز احسان شكرخدا و ائلدار صديق ايكيميز بيرليكده «حسين دوزگون»ون شعرلري و ادبياتي يازيلاري و اونون باره سينده اولان شعرلري و ادبي يازيلاري بو وبلاقدا سيزه سوناجاغيق. اوميد ائديريك لذت آپاراسيز.